Spitalet ”po boshatisen”: Gjithmonë e më shumë mjekë largohen nga vendi

Në kërkim të punësimit në shtetet e Bashkimit Europian apo Amerikës Veriore, gjithmonë e më shumë mjekë po largohen nga vendi. Si pasojë e kësaj, spitalet e rretheve kanë mbetur pa mjekë specialistë dhe rikuperimi nga të diplomuarit e rinj është në minimumin e tij.

Të dhënat nga Urdhëri i Mjekut thonë se 265 mjekë janë larguar nga Shqipëria dy vitet e fundit, 32 prej të cilëve, ishin specialistë të fushës. Vetëm gjatë 2017-s, 125 mjekë kanë kërkuar çertifikatën që dëshmon sjellje të mirë të mjekut për t’u larguar jashtë Shqipërisë.

Pasojat e këtyre lëvizjeve po i ndjejnë spitalet e rretheve më së shumti, ku në Dibër një mjek i vetëm shërben për 24 orë. Në Lushnje, departamenteve u mungojnë dhjetë mjekë gjithsej, ndërsa në Fier, pesë.

Fakulteti i Mjekësisë diplomon rreth 250 studentë çdo vit dhe gjysma e tyre largohen nga vendi pa u futur ende në tregun e punës këtu. Prej këtyre mungesave në rrethe të parikuperueshme nga të diplomuarit, spitalet në Tiranë vuajnë radhë të gjata dhe mbipopullim, shkruan TV Klan.