Spitali i ri psikiatrik në Elbasan, Koçiu: Strukturë moderne dhe funksionale, do të akomodohen 70-80 pacientë

Në qytetin e Elbasanit është drejt përfundimit projekti i Spitalit të ri Psikiatrik. Ministrja e Shëndetësisë dhe Mbrojtjes Sociale, Albana Koçiu ndau në rrjetet sociale pamje nga projekti i këtij spitali. “Një strukturë e re jo vetëm moderne, por edhe funksionale sipas koncepteve bashkëkohore të menaxhimit spitalor. Godina do të jetë prej 3270 m² dhe do të akomodojë 70-80 pacientë, me 26 dhoma, 2 mensa e 2 dhoma rekreacioni”, tha Koçiu.

Koçiu u shpreh se “mbetemi të angazhuar për të investuar në shëndetin, mirëqenien dhe dinjitetin e qytetarëve. Shëndeti mendor është një prioritet kritik për shoqërinë në tërësi”. Përveç investimit në infrastrukturë, mobilim dhe pajisje, për MSHMS është e rëndësishme që të vijohet edhe investimi në kapacitete humane, që do të thotë në trajtimin dhe trajnimin e vazhdueshëm të stafeve që shërbejnë në këto struktura spitalore me protokolle shëndetësore të miratuara tashmë.

Në buxhetin e vitit 2024 janë parashikuar investime të rëndësishme për fuqizimin, përmirësimin dhe forcimin e kapaciteteve infrastrukturore në shërbimin për të sëmurë të shëndetit mendor. Sipas MSHMS-së, me rëndësi është edhe trajnimi i vazhdueshëm i stafit për t’u ofruar shërbim sa më dinjitoz pacientëve që janë të shtruar në këto struktura spitalore.

Spitali Psikiatrik i Elbasanit, Spitali Psikiatrik i Vlorës dhe 60 qendra shëndetësore i shtohen infrastrukturës shëndetësore tërësisht të rehabilituar dhe që do të përfundohen brenda vitit 2024, investime të buxhetit të shtetit, por dhe me mbështetjen e Bankës Botërore.