Stambolli ndalon konsumimin e alkoolit në vende publike

Guvernatori i Stambollit, një zyrtar i emëruar nga presidenti i Turqisë, Rexhep Tajip Erdogan, ka zbatuar ndalimin e konsumit të alkoolit në vende publike si parqe, plazhe dhe zona pikniku, siç raportojnë mediat turke.

Vendimi u mor për të mbrojtur mjedisin natyror dhe për të parandaluar “shfaqjen e situatave negative”, tha guvernatori Davut Gul. Ata që nuk respektojnë ndalimin mund të përballen me një gjobë prej 617 lirash turke.

Përfaqësuesi i autoriteteve qendrore në provincën e Stambollit nuk dha një bazë ligjore për vendimin. Në Turqi, nuk ka asnjë ligj që ndalon në mënyrë eksplicite konsumimin e alkoolit në vende publike. Rregullorja e vetme në fuqi është neni 35 i Ligjit për Kundërvajtje, i cili parashikon gjoba për “individët që prishin qetësinë e të tjerëve nën ndikimin e alkoolit”.

Ky vendim është i fundit në një sërë masash të marra nga qeveria për të kufizuar konsumin e alkoolit në Turqi.

Në 10 vitet e fundit, ka pasur një ndalim të shitjes së pijeve alkoolike në dyqanet e pijeve pas orës 22:00. Në fillim të këtij viti, qeveria e rriti dënimin minimal për shkeljen e kësaj rregulloreje në 215 mijë lira dhe atë maksimale në 1 milion lira (8500-34000 euro).

Vitet e fundit janë rritur ndjeshëm edhe akcizat për pijet alkoolike. Mbi 60% e çmimit të shitjes me pakicë të pijeve me shumë alkool si raki, vodka dhe xhin përbëhet nga taksat; për birrën, është afërsisht 55%.

Reklamimi i pijeve alkoolike në vitrinat e dyqaneve është gjithashtu i paligjshëm në Turqi.