Sterilizimi, Manastirliu: Siguroj qytetarët, jo vonesë për ndërhyrjet kirurgjikale

Ministrja e Shëndetësisë dhe Mbrojtjes Sociale, Ogerta Manastirliu, gjatë fjalës së saj në Kuvend u ka kthyer përgjigje të gjithë kritikëve të koncensionit të sterilizimit, duke theksuar se nuk ka asnjë vonesë për ndërhyrjet kirurgjikale më instrumentat e rinj. ”Asnjë ankesë, nga asnjë qytetar nuk ka sot për vonesa në shërbimin e kirurgjisë me instrumentat e rinj kirurgjikalë. Për ata që flasin, kush nga padija dhe kush nga ligësia i informoj se ky koncesion, nuk është koncesioni i veglave të kirurgjisë por ka lidhje me ofrimin e shërbimit të plotë të sterilizimit dhe dua të siguroj qytetarët se asnjë vonesë nuk ka pasur dhe nuk do të ketë për ndërhyrjet operatore, qoftë kur janë urgjente, gjithashtu dhe për pjesën tjetër të ndërhyrjeve të planifikuara të cilat janë duke u realizuar sipas të gjitha procedurave, me instrumentet e rinj kirurgjikalë, në të gjithë spitalet e vendit”.

Në fjalën e saj në Kuvend, Manastirliu tha se vetëm në 10 muajt e parë të këtij viti më shumë se 47 mijë qytetarë kanë kryer ndërhyrje me standarde bashkëkohore, duke theksuar dhe investimet e kryera në 9 centralet e sterilizimit. ”47 mijë pacientë kanë kryer ndërhyrje kirurgjikale me standarde të larta, me siguri të lartë. 7.3 % më shumë ndërhyrje të kompleksitetit të lartë së një vit më parë. 12 % ndërhyrje kirurgjikale më shumë të kompleksitetit të mesëm së një vit më parë. Më shumë se 9 centrale sterilizimi janë investuar në spitalet rajonale të vendit. Më shumë se 90 mijë sete instrumentash kirurgjikalë sot përdorin mjekët tanë kirurgë”. Në fjalën e saj në Kuvend ministrja është shprehur se buxheti për 2019 është buxheti i qytetarëve pasi ka përmbushur nevojat e tyre në të dy sektorët.

Manastirliu theksoi se 450 mijë qytetarë janë përfitues të drejtpërdrejtë të shërbimit të përmirësuar në 100 qendrat e rindërtuara të kujdesit parësor. Janë më shumë se 499 mijë qytetarë të siguruar ose jo kanë përfituar nga paketa e barnave të rimbursueshme. Gjithashtu ministrja u ndal edhe tek bonus i bebes dhe ndihma ekonomike që vijnë në ndihmë të drejtëpërdrejtë të familjeve shqiptare për 30 mijë fëmijë në vit. Manastirliu u ndal edhe tek programet e tjera të mbrojtjes sociale, duke theksuar 63,860 familje në nevojë kanë përfituar pagesën e plotë të ndihmës ekonomike, e cila deri dje jepej si lëmoshë, e copëzuar prej abuzimeve e politikës së mbrapshtë. Buxheti 2019 është rritur me 300 milion lekë më shumë për aftësinë e kufizuar për implementimin e reformës së aftësisë së kufizuar, nga e cila do të përfitojnë më shumë qytetarë.