Takimi me të dërguarit e Trump, Zelensky: Lufta mund të vijojë edhe gjatë dimrit! Ukraina ka nevojë për mbrojtje ajrore

Presidenti ukrainas Volodymyr Zelensky ka deklaruar se pret që lufta me Rusinë të vijojë edhe gjatë dimrit, pas përfundimit të bisedimeve në Kiev me të dërguarit kryesorë të presidentit amerikan Donald Trump.

Takimet me Steve Witkoff dhe Jared Kushner përfunduan pa një njoftim për ndonjë përparim të madh drejt një marrëveshjeje paqeje. Të dy të dërguarit udhëtuan në Ukrainë për herë të parë që prej nisjes së pushtimit të plotë rus, pasi një ditë më parë zhvilluan bisedime me presidentin rus Vladimir Putin në Moskë.

Witkoff tha se ishte “i inkurajuar” nga ato që i cilësoi si bisedime “substanciale” dhe të rëndësishme në Kiev.

Nga ana e tij, Zelensky theksoi se Ukraina kërkon një paqe të drejtë, e cila të mos i lërë Rusisë mundësinë për të nisur një tjetër agresion në të ardhmen.

Pas bisedimeve disaorëshe, të zhvilluara me dyer të mbyllura, presidenti ukrainas u tha gazetarëve se ishte rënë dakord që zyrtarë nga Ukraina, Evropa dhe SHBA-ja të takohen së shpejti për të vijuar diskutimet.

“Jemi të bindur se do të ketë një zgjidhje të mirë”, deklaroi Witkoff, duke shtuar se negociatorët amerikanë kishin bërë “shumë përparim në Moskë”, duke iu referuar bisedimeve me palën ruse të zhvilluara të shtunën.

Zelensky paralajmëroi se, nëse lufta vijon gjatë dimrit, që është ajo që duket për momentin, Ukraina do të ketë nevojë për mbështetje të mëtejshme në mbrojtjen ajrore dhe sektorin energjetik.

Ukraina është mbështetur te sistemet amerikane Patriot për të luftuar kundër raketave balistike ruse, ndërsa gjatë luftës ka përdorur një pjesë të konsiderueshme të rezervave të saj.

Në vitet e mëparshme, Rusia ka përqendruar sulmet e saj gjatë muajve të dimrit në infrastrukturën energjetike të Ukrainës, duke shkaktuar ndërprerje të energjisë dhe dëme të mëdha.

Duke folur për takimin me Vladimir Putinin në Moskë, Jared Kushner tha se ekipi amerikan shqyrtoi shumë nga idetë që deri tani nuk kishin funksionuar dhe u përpoq të përcaktonte se cilët elementë nevojiten për të arritur një paqe të qëndrueshme.

“Ishte një dialog shumë i mirë. Ai bëri shumë pyetje, ne bëmë shumë pyetje”, tha Kushner, sipas BBC.

Witkoff shpjegoi se takimi me Putinin ishte zhvilluar fillimisht, pasi pala amerikane “duhej të dëgjonte se ku qëndronte ai”.

Të dërguarit amerikanë udhëtuan drejt Kievit me tren, pasi fillimisht fluturuan drejt Polonisë. Sipas Zelenskyt, pavarësisht përgatitjeve, avioni i tyre nuk mundi të ulej në Ukrainë.

Ndërkohë, Putin dhe Zelensky kishin rënë dakord për ndalimin e sulmeve ndaj kryeqyteteve të njëri-tjetrit për tre ditë, gjatë kohës që negociatorët amerikanë zhvillonin udhëtimin dhe takimet e tyre.

Pavarësisht bisedimeve diplomatike, gjatë natës forcat ruse dhe ukrainase vijuan shkëmbimin e sulmeve. Ukraina konfirmoi se kishte goditur një rafineri nafte, një aeroport ushtarak dhe dy sisteme të mbrojtjes ajrore.

Më herët, Forcat Ajrore të Ukrainës raportuan se Rusia kishte sulmuar territorin ukrainas me 108 dronë me rreze të gjatë veprimi dhe raketa të vogla të tipit cruise.

Sipas autoriteteve ukrainase, mbrojtja ajrore rrëzoi 82 dronë dhe gjashtë raketa. Megjithatë, u goditën 11 zona, ndërsa mbetjet e mjeteve të rrëzuara ranë në shtatë zona të tjera.

Bisedimet e së shtunës në Moskë zgjatën rreth tre orë dhe u zhvilluan me dyer të mbyllura në Kremlin.

Këshilltari i Putinit, Yuri Ushakov, i cilësoi ato si “konstruktive dhe jashtëzakonisht të sinqerta”. Sipas tij, gjatë takimit u diskutua për përfundimin e luftës, çështje ekonomike, si dhe për projekte të mundshme me përfitim të ndërsjellë ruso-amerikan.

Ushakov tha gjithashtu se u vunë re përparimet e prekshme të ushtrisë ruse në zonën e luftimeve dhe se u pranua se bisedimet duheshin për të adresuar shkaqet rrënjësore të konfliktit.