TAP ul pagat për 200 punonjës, nisin protestat: Nuk po respektohet kontrata

Ulja e pagave dhe moszbatimi i kontratave të punës nga kompania e gazsjellësit TAP në Durrës ka shkaktuar revoltën e rreth 200 punonjësve, të cilët mëngjesin e sotëm kanë ndërprerë punën dhe kanë dalë në protestë në Shënvlash.

Ata thonë se pagat e tyre janë minimale dhe se nuk paguhen për punën jashtë orarit. Punonjësit thonë se i janë drejtuar përfaqësuesve të TAP për t’i shprehur shqetësimet e tyre, por nuk kanë marrë asnjë sqarim.

“Nuk na janë paguar orët jashtë orarit. Jemi punësuar me kontratë 3-mujore. U punësuam me paga 30 mijë lekë të reja në muaj. Muajt e fundit kjo kontratë nuk është respektuar. Për muajin gusht jemi paguar vetëm 200 euro. Përfaqësues të TAP nuk na japin asnjë sqarim”, shprehen protestuesit.

Pas kësaj ka ardhur edhe reagimi i kompanisë TAP, përfaqësuesit e së cilës sqarojnë se situata me pagesat do të zgjidhet shumë shpejt.

“TAP është informuar për situatën e krijuar midis kontraktorit Spiecapag dhe punëtorëve të kësaj kompanie. TAP ka marrë garancinë nga Spiecapag që situata me pagesat do të zgjidhet shumë shpejt”, sqarojnë përfaqësuesit e TAP për mediat.