Taulant Balla në Kavajë: Ekonomia e Shqipërisë është trefishuar, projekti i Zvërnecit do të ecë përpara

Drejtuesi politik i PS-së për qarkun Tiranë, Taulant Balla ka vijuar takimet terren, duke u ndalur në Vorrozen, Kavajë, ku ka diskutuar mbi zhvillimet ekonomike dhe projektet e investimeve në zonë.

Balla u shpreh se çdo përpjekje për ta “tërhequr Shqipërinë pas” nuk do të ketë sukses, duke theksuar se vendi po ecën përpara dhe nuk do të frikësohet nga “ëndrrat e mëdha” të zhvillimit.

Ai foli për investimin në Zvërnec, ku nënvizoi se projekti do të realizohet dhe se ka dakordësinë e banorëve të zonës. Balla shtoi se turizmi është një nga sektorët kryesorë të zhvillimit ekonomik dhe se në vendet e rajonit investimet në resorte janë një praktikë e zakonshme.

Po ashtu Balla është ndalur edhe tek rritja ekonomike, duke u shprehur se ekonomia e Shqipërisë është rritur ndjeshëm krahasuar me vitin 2013 dhe sipas tij është trefishuar në raport me atë periudhë, duke përmendur rritjen nga rreth 9,5 miliardë euro në mbi 26 miliardë euro.