Të drejtat e grave në punë, ministrja Koçiu: Mbështetje për mbi 6,000 kryefamiljare
Ministria e Shëndetësisë dhe Mbrojtjes Sociale ka nisur një fushatë informuese në të gjithë vendin për barazinë gjinore, të drejtat e grave në fushën e punësimit, vendin e punës, mos-diskriminimin në vendin e punës, leja prindërore dhe aksesi i tyre në të drejtat.
Ministrja e Shëndetësisë dhe Mbrojtjes Sociale, Albana Koçiu ka lancuar nisjen e fushatës në Shkodër me temë, “Fuqizimi i grave dhe vajzave përmes rritjes së aksesit në të drejtat ekonomike, ligjore dhe sociale” ku merrnin pjesë ministrja e Shtetit për Marrëdhëniet me Parlamentin, Elisa Spiropali, zv/ambasadori i Francës në Shqipëri, Samuel Richard si dhe përfaqësues të pushtetit lokal në Shkodër.
”Një grua e fortë ekonomikisht apo një grua që ka mundësi të sigurojë vetë ekzigjencat e përditshme është një aktor kryesor në shoqëri e cila më pas i ka dyert e hapura për të pasur më shumë akses ndaj të drejtave të saj”. Ministrja Koçiu solli në vëmendje një sërë iniciativash të ndërmarra nga qeveria dhe MSHMS për të fuqizuar ekonomikisht gratë.
“Kemi trefishuar ndihmën ekonomike për gratë dhe vajzat e dhunuara dhe të abuzuara. Kemi dyfishuar ndihmën ekonomike për gratë kryefamiljare me dy ose më shumë fëmijë. Sikundër dhe kemi dyfishuar ndihmën ekonomike për ato familje që kanë mbi 3 fëmijë dhe padiskutim një incentivë e viteve të fundit është edhe pagesa e kontributeve të sigurimeve shoqërore dhe shëndetësore për gratë e papuna me tre apo më shumë fëmijë”, deklaroi Koçiu.
Gjatë bashkëbisedimit u diskutua për diskriminimin gjinor në vendin e punës, aksesi në ndihmën juridike falas për gratë dhe vajzat, monitorimi i zbatimit të legjislacionit dhe praktikës ligjore në mjedisin e punës si dhe mundësitë dhe aksesi për gratë dhe vajzat në tregun e punës.
