Terror nga ISIS, ekzekutohen publikisht 18 persona
Terroristët e ISIS nuk ndalen. Sipas raportimeve të fundit ata kanë ekzekutuar publikisht 18 persona në qytetin e Palmirës, në qendër të Sirisë. Lajmi është bërë i ditur nga Observatori sirian për të Drejtat e Njeriut.
Në mesin e viktimave janë edhe ushtarë të qeverisë, të cilët janë zënë rob në luftë si dhe persona të tjerë të akuzuar për bashkëpunim me regjimin sirian.
Palmira, një nga zonat e rëndësishme arkeologjike në botë për shkak të rrënojave romake, ka qenë edhe skenë e disa prej shkatërrimeve më të rënda nga ana e Shtetit Islamik.
Ky vend ra nën kontrollin e militantëve të ISIS-it në maj të këtij viti.
Pak muaj më parë, xhihadistët hodhën në erë disa tempuj dhe monumente. Ndërsa në korrik, ata përdorën rrënojat e një teatri romak për të ekzekutuar 25 ushtarë.
Në gusht ISIS-i ekzekutoi publikisht edhe 81-vjeçarin Khaled Al-Assad, i cili ishte drejtor i kësaj zone arkeologjike prej më shumë se 40 vitesh.