Terrori si mjet i pushtetit, nga kriza në krizë për të qenë nën diktat

Nga: Alban Daci

Po dëgjojmë përmes një deklarate për shtyp, alarmin e kryeministrit tonë që në cilësinë e liderit botëror, po na paralajmëron me një krizë tjetër të tmerrshme, atë të energjisë.

Këtë me siguri e bën duke ju referuar edhe rastit të UK! Sa ka të vërteta kjo dalje e kryeministrit tonë që duket si deklarata e një gjëme të madhe apokaliptike! Lideri jonë në cilësinë edhe të liderit botëror, tashmë, si një iluzion i kahershëm i tij, u referohet edhe rritjes së çmimeve të gazit dhe karbonit në botë!

Së pari, kriza në UK nuk është për mungesë benzine, por për shkak se kamionistët, që transportojnë benzinën dhe e shpërndajnë, kanë bërë greve e protestë.

Së dyti, luhatjet e çmimit të gazit dhe të karbonit në botë janë në limitet normale.

Së treti, tashmë, kemi thuajse zgjidhjet alternative, sepse makinat elektrike janë, tashmë, prezencë e rëndësishme në treg dhe në trafik! Shqipëria, për energji elektrike, ka burime te mjaftueshme të pavarura edhe në rastet apokaliptike.

Së katërti, nuk ka vend për asnjë alarm apokaliptik. Teoria e terrorit dhe paniku nuk duhet të jenë cilësi të një lideri që, teorikisht, duhet të jetë i gatshëm ta qeverisë vendin edhe në situata reale të vështira.

Siç duket, terrori dhe ankthi janë, tashmë, strategji reale të pushtetit, për të qeverisur turmat në formën e diktatit dhe vrasjes së shpresës. Liderët e mëdhenj duken, realisht, edhe në momente të vështira, duke ringjallur shpresë e besim me dhënien e shembullit personal.

Si mund ta kuptoi deklaratën e liderit tonë një fshatar i shkretë, në fshat, që po mbledh mollët e po vret mendjen nëse do t’ i shes me çmimin e merituar? Çfarë do të kuptojnë qytetarët nga deklarata e kryeministrit tonë, të dalin të gjithë njëherësh në kaos për të zënë radhën për benzinën e makinës?

Si duhet ta kuptojnë deklaratën e kryeministrit tonë ata qytetarë që kanë shpresë te hidrocentralet e rinj, që janë në plan për t’u ndërtuar, se këtë dimër do e kalojnë në terr, sepse gazi në Rusi kushton më shumë?