Testi fizik i 403 kandidatëve për hetues në FBI-në shqiptare, detajet si do procedohet

Ditën e sotme do të zhvillohet testi fizik i 403 kandidatëve të Byrosë Kombëtare të Hetimit. Më 15 tetor u zhvillua Testi i Arsyetimit Logjik për përzgjedhjen e kandidatëve për hetues për fazat e mëtejshme të konkurrimit. Në Testin e Arsyetimit Logjik morën pjesë 424 kandidatë dhe u kualifikuan 403. Faza e testit fizik është e ndarë në 4 grupe dhe do të zhvillohet në ambientet e Repartit Special “RENEA”, Yzberisht, Tiranë.

Testi fizik:

Datë 19.10.2020, do paraqiten për testim kandidatët që janë në listë, me numër rendor : 1 (një) deri në 100 (njëqind) Datë 20.10.2020, do paraqiten për testim kandidatët që janë në listë, me numër rendor: 101 (njëqind e një) deri në 201 (dyqind e një). Datë 21.10.2020, do paraqiten për testimin kandidatët që janë në listë, me numër rendor: 202 (dyqind e dy) deri në 302 (treqind e dy). Datë 22.10.2020, do paraqiten për testim kandidatët që janë në listë me numër rendor: 303 (treqind e tre) deri në 403 (katërqind e tre).

Kandidatët në ambientet e Repartit Special “RENEA” duhet të paraqiten në orën 08.00, të pajisur me maska. BKH ka edhe një porosi.

“Merrni atlete dhe veshje sportive të përshtatshme për vrapim, si edhe pije freskuese. Kandidatët para fillimit të Testit të Aftësive Fizike do të regjistrohen duke paraqitur një dokument identifikimi me fotografi (pasaportë ose kartë identiteti). Dokumenti identifikimit do të krahasohet me gjeneralitetet e parashikuar në listën emërore. Kandidatët para se të marrin pjesë në test do të dorëzojnë tek Komisioni i Përzgjedhjes Raportin Mjekësor, nga specialisti Kardiolog, që vërteton që janë të aftë fizikisht për të marrë pjesë në këtë test pa rrezikuar për infarkt kardiak ose komplikacione kardiovaskulare”, thuhet në njoftim.

Në fund të këtij procesi do të zgjidhen 60 hetues që më pas do të trajnohen nga FBI dhe do të përbëjnë të gjithë grupin e hetuesve në BKH, e cila do të hetojë zyrtarët e lartë të përfshirë në krim dhe korrupsion.