Theth, flakët avancojnë prej erës së fortë

Në zonën e Thethit sërish është aktivizuar një vatër zjarri. Flakët janë shfaqur gjatë paradites në vendin e quajtur Guri i Nënshtegut dhe menjëherë pranë vatrës së zjarrit janë drejtuar punonjës të Njësisë Administrative, banorë të zonës dhe specialistë zonave të mbrojtura.

Nga Shkodra është nisur edhe një mjet zjarrfikës së bashku me efektiv të repartit të zjarrfikësve të Shkodrës. Në koordinim me strukturat e emergjencave civile në Prefekturën e Shkodrës në drejtim të Thethit është nisur edhe një grup prej 30 ushtarësh për të qenë pjesë e operacionit për shuarjen e kësaj vatre zjarri.

Po ashtu rreth orës 12:00 të paradites së sotme është riaktivizuar vatra e zjarrit në lagjen Kaprre në fshatin Ndërlysaj, ku edhe atje ka prezencë të forcave të angazhuara për shuarjen e flakëve të zjarrit.