Kryeministri i Britanisë së Madhe, Keir Starmer arriti sot në Shqipëri. Kjo është hera e parë që një kryeministër britanik vjen në Shqipëri në një vizitë zyrtare. Pas 104 vitesh marrëdhënie diplomatike, vjen për herë të parë kryeministri britanik Keir Starmer. Kjo tregon nivel të ri marrëdhënieve mes dy vendeve.
Keir Starmer është edhe “krushku” i parë që ka mbërritur në Tiranë për takimin e madh europian në kryeqytetin e Shqipërisë.
Sot liderët europianë dhe ata të Ballkanit Perëndimor pritet të vijnë në Shqipëri në kuadër të samitit të Komunitetit Politik Europian, i cili do të mbahet në Shtëpinë e Europës të zhvendosur në Sheshin “Skënderbej”. Do të vijnë 53 liderë shtetesh.
Këmba e parë, e mbarë, ishte e kryeministrit të Britanisë së Madhe, edhe për faktin se mbetet vizita e parë e një kryeministri britanik.
Shefi i qeverisë britanike, Starmer, njihet për dashamirësinë që ka për shqiptarët, ndërkohë na kujtohen fjalët dhe akuzat e disa pjestarëve të qeverisë së mëparshme që i quanin shqiptarët si “pushtues”.
Ndaj ardhja e Keir Starmer është një ogur i mirë për Shqipërinë. Starmer është njeri pragmatist, pra si njeri që synon zgjidhjen e problemeve britanike, por edhe të shteteve mike.
