“Toyota”-t me 3.4 mln euro, Lika i dënuar 2 herë për dhunë

Tre milionë e 366 mijë e 700 euro dhe 80 mijë franga belge është shifra që u gjetën të fshehura në dyert dhe sediljet e dy “Toyota Yaris”, të cilat zbarkuan në portin e Durrësit.

Katër persona janë arrestuar deri më tani dhe dy të tjerë janë në kërkim. Policia ka ushtruar kontroll te servisi i Eduard Likës, i cili rezulton se duhet të ishte në arrest shtëpie për dhunë në familje.

Lika nuk është i panjohur për drejtësinë, në dy raste është dënuar për krime në familje. 41-vjeçari Edi Lika ishte i dënuar me arrest shtëpiak për dy vjet nga Gjykata e Apelit.

Vepra për të cilën ai akuzohet është ajo e dhunës në familje ndaj të birit Klevi Cani Lika, edhe ky i arrestuar të dielën për ngarkesën e eurove e frangave më të madhen të sekuestruar ndonjëherë.

Lika është dënuar edhe më herët po për dhunë në familje ndaj bashkëshortes. Kësaj radhe ndaj tij dhe bashkëpunëtorëve që u kapën në Durrës janë regjistruar hetimet për pastrim parash dhe mos deklarim të ardhurash në kufi.