Tragjedi në brigjet e Qipros Veriore, përmbyset trageti me 270 persona në bord, konfirmohen 7 të vdekur dhe dhjetëra të zhdukur

Të paktën shtatë persona kanë humbur jetën dhe më shumë se 20 të tjerë rezultojnë të zhdukur pasi një traget pasagjerësh u përmbys të dielën në brigjet e Qipros Veriore. Mjeti lundrues, i cili transportonte rreth 270 pasagjerë dhe anëtarë të ekuipazhit, u mbyt vetëm pak minuta pasi ishte nisur drejt Turqisë.

Sipas raportimeve nga agjencia Associated Press (AP) dhe kanali shtetëror turk TRT, trageti i stilit katamaran ishte nisur nga porti i Kyrenias (i njohur gjithashtu si Girne) në veriun e Qipros, me destinacion portin e Taşucu-t në provincën Mersin të Turqisë. Anija filloi të merrte ujë rreth 7.5 kilometra (4 milje detare) larg bregdetit, pranë plazhit Diana, rreth 15 minuta pas nisjes.

Kryeministri i Republikës Turke të Qipros Veriore, Ünal Üstel, në një deklaratë për mediat turke të cituar nga DailySabah, konfirmoi përmasat e ngjarjes dhe operacionin e gjerë të shpëtimit.

“Anija dërgoi një sinjal rreziku në orën 12:10, duke raportuar për rrjedhje uji rreth tri milje në veri të bregdetit. Rreth 237 persona janë shpëtuar deri tani, ndërsa kërkimet po vijojnë intensivisht për 23 të tjerë. Fatkeqësisht, kemi viktima,” theksoi Üstel.

Kryebashkiaku i Kyrenias, Murat Şenkul, bëri të ditur se trageti operohej nga kompania e lundrimit Filo Denizcilik. Operacionet e kërkim-shpëtimit po zhvillohen përmes koordinimit të helikopterëve dhe mjeteve të tjera lundruese që ndodheshin në afërsi. Pamjet dramatike të transmetuara në televizionet lokale shfaqnin pasagjerë me jelekë shpëtimi që notonin rreth trupit portokalli të anijes së përmbysur në kushte moti me diell.

Dëshmitë e të mbijetuarve, akuza për neglizhencë ndaj kapitenit

Krahas operacioneve të shpëtimit, dëshmitë e para të pasagjerëve ngrenë pikëpyetje serioze mbi vendimmarrjen e ekuipazhit para tragjedisë. Sipas agjencisë ANSA, të mbijetuarit kanë ndarë rrëfime tronditëse në mediat sociale, duke theksuar se tragjedia mund të ishte shmangur.

“Ne i kërkuam dhe iu lutëm kapitenit të kthehej prapa sapo trageti filloi të mbushej me ujë,” citohen të kenë thënë disa prej të mbijetuarve. “Por ai nuk na dëgjoi.”

Autoritetet nuk kanë publikuar ende një raport zyrtar mbi shkaqet teknike që çuan në çarjen apo mbytjen e shpejtë të mjetit lundrues, ndërkohë që prioritet mbetet gjetja e personave që ende rezultojnë të zhdukur në ujërat e Mesdheut.

RTSH