Ish-deputeti i Partisë Demokratike Aldo Bumçi u shpreh në studion e lajmeve të Ora News, se beteja për të mbrojtur Gjykatën Kushtetuese nuk është betejë e Presidenti, por e popullit. Ai tha se Gjykata Kushtetuese është ajo që mbron qytetarët dhe kontrollon qeverinë. Bumçi solli në kujtesë disa nga rastet kur Gjykata Kushtetuese ka qenë vendimtare në marrjen e vendimeve të saj. Ndërkohë, ai kujtoi se gjatë qeverisjes së PD-së u hodhën poshtë të paktën 35 ligjeve të qeverisjes së Partisë Demokratike.
“Nuk është betejë për kompetencat e njërit apo tjetrit. Gjykata Kushtetuese në Shqipëri ka luajtur një rol të jashtëzakonshëm. Kur ne kemi qenë në qeveri na ka rrëzuar mbi 35 ligje. Kjo tregon kontroll të qeverisjes, tregon se ka qenë e pavarur. Pati një fushatë kundër biznesit, luftë kundër informalitetit. Qeveria ndryshoi ligjet dhe nëse të kapte pa kupon tatimor, të falimentonte biznesin.
Këtë paketë që do të shkatërronte biznesin e rrëzoi gjykata. Ky është vendim që mbrojti 130 mijë biznese të Shqipërisë. Qeveria Rama kaloi me vendim që mund të prishte ndërtime pa leje, por gjykata ia rrëzoi. Kjo gjykatë i ka mbrojtur qytetarët. Kjo gjykatë rrëzoi kërkesën për numrin IMEI të telefonave. Gjykata Kushtetuese ka qenë institucioni që ka vendosur kufirin, ka kontrolluar qeverisje. Jemi në vitin e tretë që nuk kemi gjykatë. Kjo nuk është ngritur jo për shkak të betimit por të KED. Rama nuk donte të ngrihej gjykata. Gjykata Kushtetuese është vetëm për të kufizuar qeverinë dhe për të mbrojtur qytetarët. Kjo nuk është betejë e presidentit dhe opozitës, por e atyre që duan të mbrojnë pronën”, deklaroi ish-deputeti demokrat.
Më tej, Aldo Bumçi u shpreh se Presidenti nuk po bëhet palë me opozitën. Ai tha se Kreu i Shtetit po mbron demokracinë duke folur kundjes vendosjes së “sulltanatit” të Edi Ramës.
“Presidenti nuk po bëhet palë. Këtu po flasim për demokracinë për shtetin e shqiptarëve. A do ekzistojë më kjo demokraci? Sot Edi Rama po kthehet në “sulltan” të Shqipërisë. Fjala e tij është ligj. Presidenti nëse do rrinte pa folur nuk do i shërbente qytetarëve. Nëse ky person sot është “sulltan”, çfarë pret të bëjë Presidenti; të mos flasi? Pa Gjykatë Kushtetuese, Kushtetuta është libër pa vlerë. Barriera e parë për shtetin e të drejtës është Gjykata Kushtetuese. Ne i kemi bërë këto beteja. Nuk jemi të vonuar ne. Nisëm protestat, nuk do gjesh një vend tjetër që të ketë mbajtur protesta kaq masive në Europë Lindore. Kjo tregn besim dhe energji”, theksoi Aldo Bumçi.
Aldo Bumçi deklaroi se vendi do të kthehet në normalitet nëpërmjet zgjedhjeve dhe rivendosjeve të Gjykatës Kushtetutese. Sipas tij, me ardhjen e Edi Ramës në pushtet, Shqipëria u shpopullua. Ai tha se vendi është në diktaturë, ndërsa formuloi idenë se zgjedhjet dhe Gjykata Kushtetuese e rikthejnë vendin në zgjedhje. Bumçi u shpreh gjithashtu se opozita do të jetë në 2 mars në shesh.
“Gjykata Kushtetuese është një nga gurët e rikthimit të Shqipërisë në normalitet. Gjykata dhe zgjedhjet. Presidenti ka thirrur të gjithë qytetarët shqiptarë. Ne jemi aty si qytetarë, si opozitarë, si njerëz si shpresa për të rikthyer Shqipërinë në normalitet. Edi Rama e ka shpopulluar në 7 vite vendin. Jemi një alternativë që jemi ne. Presidenti do të rikthejë normalitetin nëpërmjet akteve të tij publike.
Në këtë betejë ai do ti bjerë fort kambanës që ta dëgjojnë mirë shqiptarët. Pse i kemi bërë ne këto akte të forta? Këtu jemi në diktaturë. Rama sot ishte në Moskë, është diktaturë. Ka gjë demokraci Rusia? Ky e ka kthyer këtë vend në një “sulltanat”. Ne do ta rikthejmë normalitetin nëpërmjet rikthimit të së drejtës së zgjedhjeve dhe shtetit të së drejtës. Kodi jonë bën zgjedhje të lira kudo, edhe në Afrikë. Zgjedhjet e lira nuk bëhen prej Edi Rama. Qëkur erdhi Edi Rama nuk ka më zgjedhje të lira në Shqipëri. Këshilli i Europës nuk erdhi të monitorojë zgjedhjet”, tha ai.