Turi i Ramës me diasporën, analisti Çipa: Takime elektorale në funksion të një fushate të shpejtë

Analisti Aleksandër Çipa thotë se turet e kryeministrit Edi Rama me diasporën mund të mos jenë ture paraelektorale, por elektorale. Duke komentuar takimet e Ramës me shqiptarët e diasporës, Çipa u shpreh se statusi i tyre pas më shumë se 3 dekadash ka ndryshuar.

“Kryeministri Edi Rama duket se e ka ndërtuar si një platformë. Shoh dy gjëra që i mbart nga njëri kryeqytet në një tjetër, që ndërton në mënyrën e rafinuar fjalimin që mban për të atakuar atë që ai ka si marrëdhënie bilaterale me vendin ku zhvillohet mitingu.

Qasja e fjalimit që mbajti në Athinë ishte kryekëput e ndryshme nga ajo në Milano. Në Itali atakoi median dhe jo politikën italiane. Foli për një lloj racizmi që ia delegoi mediave.

Mendoj se mënyra sesi e ndërton takimin në cilësinë e kryeministrit, por organizimin e bën në mënyrën partiake, në thelbin e vet mendoj se kemi armatën socialiste që përgatitet për një fushatë të shpejtë elektorale”, tha Çipa.