U filmua nga SPAK duke marrë arkën me peshk dhe dy mijë euro për një punësim, sot seanca për Rovena Vodën

Ish-zv.ministrja e Brendshme, Rovena Voda ka mbërritur sot në GJKKO, ku do të zhvillohet seanca për të, pasi u vu në “arrest shtëpie” për korrupsion.

GJKKO la në ‘arrest shtëpie’ Vodën më 13 korrik, ndërsa akuzohet se ka përfituar para dhe të mira materiale për të punësuar një grua, Florida Beun , gjithashtu nën arrest shtëpiak së bashku me Majlinda Hasanin.

Kjo e fundit ka rolin e ndërmjetëses dhe sipas SPAK rezulton se shfrytëzoi njohjen me zyrtaren për të hapur një vend pune dhe për këtë arsye ato janë takuar në ministri me Vodën.

Emri i Rovena Voda lakohet nga dy zonja, njëra prej të cilave është shoqe e ish-zyrtares së lartë ndërsa tjetra ishte e interesuar që të punësohej medoemos si specialiste në një nga dikasteret dhe gjithashtu ajo ëndërronte të ishte juriste në ministrinë e brendshme.

Por gjatë konkurrimit ajo u skualifikua teksa më pas shfaqen pakënaqësitë në telefon, ku ajo tregon se kishte paguar 2 mijë euro.

E veshur me të zeza, Voda shihet teksa mbërrin në Gjykatë, e shoqëruar nga patrulla e policisë.