Uji iku, dëmi mbetet, të moshuarit përballë pasojave të papërballueshme

Më 6 janar, uji vërshoi papritur dhe për tri ditë rresht pushtoi banesën e tyre, duke lënë pas dëme të shumta, jo vetëm materiale. Për ta, kjo ishte si një luftë në dy fronte.

Petrefi dhe Nexhmija, që kanë ardhur nga Kuçova dhe jetojnë vetëm prej 27 vitesh, janë të martuar që nga mosha 18-vjeçare dhe prindër të pesë fëmijëve. Me punë dhe sakrifica, ata kanë ndërtuar jetën e tyre. Tri javë pas përmbytjes, shtëpia mbetet e ftohtë dhe plot lagështi, duke i detyruar të qëndrojnë brenda, të veshur trashë.

Ditët e fundit, falë ndihmës së fëmijëve dhe të mbesës që erdhi nga Greqia, po përpiqen të rikthejnë ngadalë normalitetin. Por ajo që mbeti më shumë pas është pasiguria. Ata kuptuan se të moshuarit që jetojnë vetëm, si ata, janë të pafuqishëm dhe më shumë se kurrë vlen të kesh pranë njerëz që kujdesen për ty.