Vaksinimi ndaj Covid-19 i shqiptarëve nga Rusia dhe Serbia

Rusia dhe Serbia janë ofruar që të vaksinojnë shqiptarët në Ballkan. Ambasada e Rusisë u ofrua publikisht të sigurojë vaksinën e saj për qytetarët e Shqipërisë. “Nuk kemi dyshime se Rusia është e gatshme të sjellë vaksinën e saj “Sputnik-V” edhe në Shqipëri. Vaksinimi me “Sputnik-V” tashmë filloi në Rusi dhe në Argjentinë, ndërkohë më shumë se 50 vende kanë aplikuar për të blerë 1,2 miliardë doza të preparatit”, thuhet në postimin e ambasadës.

Një aspekt i pazakontë i postimit ishte se oferta e papritur, ishte formuluar mbi një foto “screenshot” të një postimi në Twitter të drejtorit të komunikimit të Kryeministrisë, Endri Fuga. Ky i fundit i kishte bërë ”retweet” një qëndrimi të Ursula von der Leyen, ku Presidentja e Komisionit Europian njoftonte me gëzim shpërndarjen e vaksinës për vendet e BE, dhe mbi të, Fuga shkruante se Ballkani Perëndimor ishte lënë sërish vetëm, edhe në krizën e Covid-19.

Presidenti i Serbisë, Aleksandër Vuçiç, thotë se ishte gati të ofronte vaksina për shqiptarët e Kosovës, duke theksuar se Serbia do të vazhdojë të “përkujdeset për popullin e saj në Kosovë”. Oferta e presidentit serb u cilësua si provokim nga politikanët në Kosovë. Rusia ka prodhuar variantet e saj të vaksinës të pagëzuar si Sputnik, ndërsa Serbia ka raportuar se është vendi i parë në Ballkan që ka arritur të marrë qindra mijë doza të vaksinës Pfizer.