Vetting-u në Polici, Shehu bëhet ”kurbani i parë”

Vetting-u në Policinë e Shtetit nis me përjashtime. Komisioni i Jashtëm i Vlerësimit, ka shkarkuar ditën e sotme Oltion Shehun, shefi i Sektorit të Ankesave në Shërbimin për Çështjet e Brendshme. Komisioni konstatoi probleme në pasurinë e tij, pasi ai nuk justifikon dot shpenzimet në raport me të ardhurat. Janë rreth 1.4 milionë lekë të pajustifikuara. Pasuria e tij është një shtëpi dykatëshe në njësinë numër 8, një automjet dhe kursime bankare.

Cilat ishin shkeljet që dogjën Shehun?

Në lidhje me kolonën e integritetit moral, ai rezultoi i pastër pa kontakte me botën e krimit ndërsa në lidhje me pasurinë rezultoi se nuk justifikonte të ardhurat për ndërtimin e një banesë dy-katëshe. Edhe nga ana profesionale sipas Komisionit të Jashtëm të Vlerësimit, Shehu rezultoi me probleme pasi ndaj tij kishte dy herë masë administrative të vërejtje nga eprorët.

Për të justifikuar pasurinë e tij Shehu tha se këtë profesion e ka ushtruar prej vitit 1996 deri në vitin 2003 pa e ditur se aty kishte qenë i pasiguruar, por sipas tij kishte fitime të mëdha edhe për shkak të bakshisheve. Puna e dy dekadave më parë si menaxher në një sallë bingoje dhe të ardhurat e fituara aty i dogjën karrierën Oltion Shehut, që në përfundim të seancës ku u dha vendimi nuk pranoi që të jepte asnjë koment. Por cfarë ndodh tani? E ndërsa në rastin e Vetting-ut për njerëzit e drejtësisë kemi termin ”shkarkim”, këtu është ”përjashtim”. Njerëzit e drejtësisë apelimin e bëjnë te Kolegji i Posaçëm, ndërsa në rastin e Vetting-ut në policinë e shtetit, të shkarkuarit duhet ti drejtohen Gjykatës Administrative.

Seanca e dytë e Vetting-ut në Polici do të jetë sot me numrin dy të SHÇBA, Adriatik Ago. Trupa e vlerësimit përbëhet nga Ana Kapaj, Elvira Daberdaku, Elida Liko. Pas listës së parë me 45 drejtues të Policisë së Shtetit është zbuluar edhe lista e dytë me emrat që do t’i nënshtrohen procesit të Vetting-ut. Në listën e dyta janë 47 emrat e radhës që do të rivlerësohen, ku shumica e tyre janë drejtues të policive në qarqe.

Në Policinë e Shtetit është krijuar ”Grupi i Punës”, i cili do të punojë për hartimin dhe përgatitjen e analizës se riskut dhe planit te integritetit për efektivët. Drejtori i Përgjithshëm i Policisë së Shtetit, Ardi Veliu, më herët ka thënë se: ”Misioni i Asistencës Policore i Bashkimit Evropian në Shqipëri (PAMECA) ka hartuar raportin ‘Metodologjinë për kryerjen e një analize risku dhe identifikimi i praktikave të prirura ndaj korrupsionit në Policinë e Shtetit”. Veliu garantoi gjithashtu se: ”Policia e Shtetit është në proces vetingu të përhershëm dhe është tërësisht e angazhuar për të luftuar krimin dhe korrupsion edhe brenda radhëve të saj”.