Shqipëria shënon një tjetër zhvillim të rëndësishëm në procesin e integrimit europian. Në Bruksel po zhvillohet konferenca e nëntë ndërqeveritare mes Shqipërisë dhe Bashkimit Europian, ku pritet të zyrtarizohet mbyllja e tre grupkapitujve të tjerë të negociatave.
Kryeministri Edi Rama, i shoqëruar nga delegacioni zyrtar shqiptar, gjatë fjalës së tij tha se Shqipëria po ecën përpara BE-së. ”Po ndërtojmë Shqipërinë që duam të shohim në BE me të drejtë të plota”. Bëhet fjalë për Kapitullin 25-Shkenca dhe Kërkimi, Kapitullin 26-Arsimi dhe Kultura dhe Kapitulli 30-Marrëdhëniet me Jashtë.
Komisionerja për Zgjerimin e Bashkimit Europian, Marta Kos, e cilësoi 14 korrikun si një “Super të Martë” për procesin e zgjerimit të BE-së, duke theksuar se, për herë të parë në më shumë se dy dekada, po zhvillohen katër konferenca ndërqeveritare të anëtarësimit brenda së njëjtës ditë.
Me mbylljen e këtyre 3 kapitujve, Shqipërisë i mbeten edhe 30 të tillë me ambicien për të përmbyllur negociatat teknike brenda vitit 2027.
Pjesë nga fjala e Ramës
Faleminderit shumë. Ajo çfarë ndodhi tani shënon vërtet një gur kilometrik tjetër të rëndësishëm në rrugëtimin e pakthyeshëm të Shqipërisë në BE. Sapo ramë dakord të mbyllim 3 kapituj të rëndësishëm negociatorë dhe ky nuk është thjesht një hap, po një vlerësim i qartë që Shqipëria po ecën përpara.
Që reformat po japin rezultate dhe që vendi ynë është gjithnjë më i përgatitur për të marrë përsipër përgjegjësitë e anëtarësimit. E sërishmja është më e rëndësishme, sepse thekson një mesazh mjaft të fuqishëm: Shqipëria jep rezultate dhe BE jep rezultate. Shqipëria ecën përpara dhe BE reagon.
Proces i besueshëm, i bazuar në meritë nga të dyja anët. Është jashtëzakonisht shumë inkurajuese, super e rëndë. Faleminderit Marta që ke qenë koherente e durueshme dhe që na ke mbajtur në drejtim pavarësisht pengave dhe ne po sjellim standardet evropiane më pranë qytetarëve tanë, po forcojmë institucionet tona, po krijojmë më shumë mundësi. Prova më e mirë e kësaj është që njerëzit duan më shumë dhe njerëzit janë gjithmonë e më pak tolerantë ndaj asaj që ende nuk funksionon.
