VIDEO/ Deputeti Balliu takon protestuesit e arrestuar: Nuk ndalen, policia do të japë llogari

Deputeti i PD-së, Klevis Balliu këtë të premte ka takuar qytetarët e arrestuar pas protestës, duke theksuar se ata janë të vendosur të vijojnë qëndresën e tyre. Përmes një reagimi publik, Balliu tha se të arrestuarit ishin “më të motivuar se kurrë” dhe falënderues ndaj qytetarëve që, sipas tij, u qëndruan pranë deri në orët e vona të natës jashtë ambienteve të paraburgimit. Balliu akuzon Policinë e Shtetit për veprime që i cilësoi kriminale, ndërsa paralajmëroi se, sipas tij, drejtuesit e policisë do të thirren për të dhënë llogari.

Postimi i plotë

Sot pata mundësinë të takoj qytetarët që u arrestuan padrejtësisht. Ata ishin më të motivuar se kurrë dhe shumë falënderues ndaj të gjithë shqiptarëve, veçanërisht ndaj miqve të tyre, të cilët qëndruan pranë tyre përballë dhomave të paraburgimit deri në orët e vona të natës.

Ndërsa aktet kriminale të policisë së pushtetit do të marrin përgjigjen e merituar, Partia Demokratike do ta thërrasë drejtorin e Policisë që të japë llogari.

Është e turpshme të akuzosh këta qytetarë për dhunë, kur ata, edhe kur ishin 200 mijë protestues, nuk kryen asnjë akt dhune. Është turp që sot në burg janë këta heronj, ndërsa Parlamenti dhe institucionet e shtetit janë uzurpuar nga hajdutët e narkopushtetit.

Por këta qëndrestarë ishin të qartë se nuk do të ndalen. Turpi do t’i mbulojë të gjithë ata që heshtin përballë kësaj padrejtësie.