Vihen nën kontroll flakët në Dropull dhe Finiq, Ministria e Mbrojtjes: Pritet aktivizim i avionëve PZL nga Greqia

Situata nga zjarret në fshatin Grapsh të Bashkisë së Dropullit dhe në fshatin Kardhikaq të Bashkisë së Finiqit është përmirësuar pas angazhimit nga toka dhe nga ajri.

Ministria e Mbrojtjes informon se për momentin nuk ka rrezik për banorët dhe banesat e këtyre fshatrave.

Sipas ministrisë, forcat operacionale të Dropullit, Gjirokastrës, Tepelenës, Përmetit, Këlcyrës, Memaliajt, Finiqit, Sarandës, Himarës, Delvinës dhe Konispolit vijojnë ende punën, pasi rreziku për riaktivizimim e vatrave vijon ende si pasojë e ndryshimit të shpejtësisë së erës.

Gjithashtu bëhet me dije se pritet aktivizimi i dy avionëve PLZ nga Greqia.

Reagimi i Ministrisë së Mbrojtjes:

Pas një pune të pandërprerë të forcave në terren dhe nga ajri ka përmirësim të situatës së zjarrit në fshatin Grapsh në bashkinë Dropull dhe në fshatin Kardhikaq në bashkinë Finiq, duke mos shfaqur më rrezik për banorët dhe banesat e fshatrave.

Megjithatë forcat operacionale të Dropullit, Gjirokastrës, Tepelenës, Përmetit, Këlcyrës, Memaliajt, Finiqit, Sarandës, Himarës, Delvinës dhe Konispolit vijojnë punën për shuarjen e zjarrit, pasi rreziku për riaktivizimim e vatrave vijon ende si pasojë e ndryshimit të shpejtësisë së erës.

Forcat e Armatosura dhe helikopteri Cougar vijojnë mbështetjen e tyre, ndërsa janë shtuar në këtë aksion edhe tre mjete zjarrfikëse të FA. Situata po ndiqet nga afër edhe nga zv.ministri i Mbrojtjes, Enkelejd Joti.

Agjencia Kombëtare e Mbrojtjes Civile kërkoi edhe mbështetjen e Mekanizmit Evropian të Mbrojtjes Civile, nga i cili ofruan ndihmën e tyre tre shtete. Pritet aktivizimi i dy avionëve PZL nga Greqia, si vendi më afër vatrave të zjarrit.