Vizitë në Qendrën e Formimit Profesional, Llatja: Arsimi profesional prioritet për të ardhmen e të rinjve

Kryetari i Bashkisë Elbasan, Gledian Llatja, së bashku me Kryetaren e Këshillit të Qarkut Ermira Urupi, zhvilluan një vizitë në Qendrën e Formimit Profesional Elbasan, në kuadër të aktiviteteve të muajit mars.
Gjatë kësaj vizite u theksua edhe një herë roli i rëndësishëm që arsimi profesional luan në përgatitjen e të rinjve për tregun e punës, duke i pajisur ata me aftësi konkrete dhe të kërkuara nga ekonomia.
Një vlerë e veçantë e këtij institucioni mbetet fakti se Qendra e Formimit Profesional në Elbasan renditet ndër më të frekuentuarat nga nxënësit, duke dëshmuar rritjen e besimit ndaj arsimit profesional dhe rëndësinë që ai ka në ndërtimin e së ardhmes së tyre.
Bashkia Elbasan vijon të mbështesë nisma dhe institucione që kontribuojnë në zhvillimin e kapitalit njerëzor dhe rritjen e mundësive për të rinjtë, duke e konsideruar arsimin profesional një prioritet kyç për zhvillimin e qëndrueshëm të qytetit.