Vojo Bregu publikon dokumentet: Shqipëria rrezikon mbylljen e eksporteve të peshkut dhe të vezëve

Koordinatori i Lëvizjes Socialiste për Integrim në Vorë, Vojo Bregu, ka publikuar disa dokumente ku thuhet se vendi rrezikon mbylljen e eksporteve të peshkut dhe të vezëve. ”Fondet e parashikuara për analizat e ndryshme që kërkohen nga Bashkimi Europian mund të jenë shpenzuar për arsye nga më të ndryshmet, por jo për prioritetin e eksportit. Ndonjë klient në nevojë për fonde, ndonjë show propagandistik me ngjyra mavi, ka marrë fondet që janë jetike pēr ekonomine tonë”,-shkruan bregu në facebook.

Postimi i plotë

SHQIPËRIA RREZIKON MBYLLJEN E EKSPORTEVE TË PESHKUT DHE VEZËVE! Fondet e buxhetit të shtetit për analizat e produkteve të peshkut dhe vezëve, nuk dihet nga kanë shkuar. Shqipëria rrezikon të përjashtohet nga lista e vendeve që mund të eksportojnë në Europë, peshk, produktet e peshkut dhe vezë.

Fondet e parashikuara për analizat e ndryshme që kërkohen nga Bashkimi Europian mund të jenë shpenzuar për arsye nga më të ndryshmet, por jo për prioritetin e eksportit. Ndonjë klient në nevojë për fonde, ndonjë show propagandistik me ngjyra mavi, ka marrë fondet që janë jetike pēr ekonomine tonë.

Bizneset shqiptare kanë eksportuar vetëm në 6-mujorin e parë të 2020 50 milion Euro dhe kanë një numër të punësuarish mbi 5 mijë persona, në një vlerë investimi në vend rreth 60 milion Euro. Mbyllja e eksporteve te peshkut, do të ishte goditje e rëndë financiare, efekti i të cilës do të ndihej për shumë vite në vazhdim.