Vrasja e Enkeledës mund të ishte parandaluar, nëse policia…

Krimi i rëndë në familjen Çapoku mund të ishte parandaluar, nëse policia do të kishte prangosur më herët autorin e dyshuar të ngjarjes, Erdet Çapoku. 34-vjeçari pasi u prangos nga efektivët e policisë së Tiranës, nuk ka bërë rezistencë, ndërsa për kapjen e tij kanë negociuar edhe familjarët. Pas vrasjes së kunatës së tij, Enkeleda Çapoku, ai u largua në drejtim të zonës së Laprakës me një biçikletë, duke u fshehur në një banesë.

Vetëm gjashtë muaj më parë në komisariatin nr.5, e ndjera kishte bërë kallzim penal pasi kërcënohej dhe shantazhohej nga vëllai i burrit të saj. Madje Enkeleda kishte marrë edhe urdhër të menjëhershëm të mbrojtjes por ndaj Erdetit nuk u lëshua asnjë urdhër-ndalimi.

Shërbimi për Çështjet e Brendshme dhe Ankesave kanë nisur verifikimet për të parë praktikën e ndjekur nga komisariati nr.5., në lidhje me kallzimin penal të bërë nga viktima Enkeleda Çapoku disa muaj më parë.