Vrasja e Mehmet Qemës, Gjykata jep vendimin: Lihet në burg autori, vetëm njëri prej shokëve i lirë

Gjykata ka vendosur masën “arrest me burg” për Marjus Demën, 28-vjeçarin që qëlloi për vdekje Mehmet Qemën në lagjen “5 Maji” në kryeqytet.

Elrin Pekës dhe Blerim Hotit iu caktua masa “detyrim paraqitje”, ndërsa Xhuliano Kocit “arrest në shtëpi”. I vetmi që fitoi lirinë ishte Frenkli Myftari, i cili u vetëdorëzua në polici vetëm disa orë pas vrasjes së 27-vjeçarit.

Të katër shokët e Marius Demës dhe Mehmet Qemës, të cilët ishin të pranishëm në vendngjarje, akuzohen për moskallëzim krimi dhe dolën kokëulur para gjykatës.

Në sallën e gjyqit Marius Dema deklaroi se Qemën e kishte si vëlla dhe gjithçka ka ndodhur aksidentalisht, teksa po luante.

Gjatë seancës gjyqësore, Prokurori përshkroi dhe pamjet ku të gjithë shokët po konsumonin ushqim dhe pije para se të ndodhte vrasja e Mehmet Qemës.

Në një moment, drejton armën nga shoku i tij. Pasi arma u shkrep në mënyrë të pavullnetshme, shihet në kamerat e sigurisë se si viktima rrëzohet nga karrigia dhe shoku i tij vrapon për ta mbajtur dhe pastaj e ul në karrige.