Porti i Vlorës në fundjavën e parë të korrikut ka shënuar një fluks të shtuar të udhëtarëve që vijnë me tragete nga shteti fqinj Italia.
Pjesa më e madhe e udhëtarëve janë emigrantë që jetojnë prej vitesh jashtë vendit dhe kthehen për të kaluar pushimet në Shqipëri, por edhe turistët të huaj që duan të vizitojnë bregdetin shqiptar.
Kapiteneria e Portit të Vlorës bëri të ditur për ATSH-në se “vetëm mëngjesin e sotëm në portin e Vlorës kanë mbërritur 599 udhëtarë dhe 120 automjete”.
Në Portin e Vlorës janë marrë të gjitha masat për pritjen e pasagjerëve.
“Lëvizja e udhëtarëve nga Italia drejt Vlorës ka njohur rritje të ndjeshme krahasuar me një vit më parë, ndërsa fluksi më i lartë pritet të jetë në javët e ardhshme të korrikut dhe gushtit”, thekson Kapiteneria e Portit të Vlorës.
Gjithashtu, autoritetet portuale kanë punuar me intensitet të lartë për përpunimin e udhëtarëve dhe automjeteve si dhe janë marrë të gjitha masat për t’i shërbyer sa më mirë fluksit të pasagjerëve sidomos gjatë sezonit turistik.
Vlora gjithnjë e më shumë gjatë sezonit turistik kthehet në një nga destinacionet më të preferuara për vizitorët vendas dhe të huaj. Bregdeti i bukur, infrastruktura e përmirësuar dukshëm dhe hapësira atraktive të tilla si Lungomare me lokalet e shumta, apo bulevardi Vlorë-Skelë, përbëjnë disa nga faktorët dhe pikat e forta për treguesit e lartë të turistëve të huaj nga vende të ndryshme të botës në qytetin e Vlorës.