Zef Gjeta nderohet në Greqi me çmimin e parë për librin “Pyetje të Çuditshme – Përgjigje Interesante”

Albert Vataj

Zef Gjeta dhe suksesi i librit të tij “Pyetje të Çuditshme – Përgjigje Interesante” është bërë lajm në vendin fqinjë, Greqinë, duke fituar çmimin e parë si libri i huaj më i mirë.

Zef Gjeta nuk është vetëm një akademik me një përvojë të pasur dhe me një kontribut të çmuar. Atë nuk e njohim vetëm nga daljet publike për të dhënë këshilla të vlefshme për të ngrënë shëndetshëm dhe për të njohur më mirë ushqimet. Ai është edhe themeluesi i gazetës së parë humoristike “Humori Shkodran”, e cila edhe pse qe jetëshkurtër, evidentoi dhe promovoi vlerat dhe penat e vërteta të humorit shkodran. Ai është prej atyre që gjithnjë ka një vlerë për të shpërfaqur, një vepër për të ofruar, një kontribut për të dhënë. Dhe ja vjen suksesi i tij në shtetin helen, në tempullin e kulturës dhe mitologjisë, atje ku lindën orakujt dhe morën qiellin perënditë.

Profesori dhe autori i mirënjohur Zef Gjeta ka shënuar një tjetër arritje të madhe në karrierën e tij letrare me librin e tij të fundit “Pyetje të Çuditshme – Përgjigje Interesante”. Ky libër, i botuar në Athinë në vitin 2024, është përkthyer mjeshtërisht nga Kosta Nasto, një ish-pedagog i gjuhëve të huaja dhe rezident i përhershëm në Greqi. Vepra ka fituar jo vetëm çmimin “Libri i huaj më i mirë”, por edhe çmimin “Përkthimi më i mirë i vitit” në një konkurs prestigjioz në Greqi, duke dëshmuar vlerën e jashtëzakonshme të tij.

Libri “Pyetje të Çuditshme – Përgjigje Interesante” është titulli i 32-të i botuar nga Zef Gjeta, duke e rritur më tej trashëgiminë e tij si një autor kreativ dhe produktiv. Ai përmban 1,000 pyetje të çuditshme, përgjigjet e të cilave janë plot humor dhe mendim “jashtë kutisë”. Ideja qendrore e këtij libri është të provokojë mendimin dhe të nxisë të qeshura, duke sjellë kënaqësi dhe reflektim përmes formës së një dialogu të përmbledhur dhe të mençur, ku ironia, cinizmi, grotesku dhe e qeshura janë aliazhe të asaj lënde që na thërret në joshje leximi dhe përjetimi, mendimi dhe arsyetimi.

Në libër mund të gjeni pyetje që në shikim të parë mund të duken të thjeshta, por përgjigjet e tyre janë plot imagjinatë dhe humor:

Në cilin muaj gratë flasin më pak?

Përgjigjja: Në shkurt, sepse nuk u dalin ditët!

Pse nuk kishte fëmijë Lenini?

Përgjigjja: Sepse nuk e duronte shtypjen e njeriut prej njeriut.

Pse mbajnë zezakët rrip të bardhë në pantallona?

Përgjigjja: Thjesht për të mbajtur pantallonat, pavarësisht nga ngjyra.

Libri është një thesar i humorit, i mendimit krijues dhe i filozofisë së përditshme. Ai është krijuar për t’i ofruar lexuesit një mënyrë për të menduar ndryshe, duke sfiduar të zakonshmen dhe duke provokuar të qeshura, shpesh në mënyrë të papritur. Zef Gjeta ka arritur të krijojë një atmosferë të ngrohtë dhe argëtuese, ku çdo pyetje dhe përgjigje shërbejnë si një ftesë për reflektim dhe gëzim.

Një pjesë e rëndësishme e suksesit të këtij libri i detyrohet përkthyesit Kosta Nasto, i cili ka sjellë me mjeshtëri nuancat humoristike dhe stilin unik të Zef Gjetës në gjuhën greke. Përkthimi është vlerësuar lart për ruajtjen e tonit origjinal dhe të ndjeshmërisë kulturore, duke u bërë një urë lidhëse mes lexuesve shqiptarë dhe grekë.

Fitorja e çmimeve prestigjioze në Greqi konfirmon jo vetëm aftësitë e autorit, por edhe fuqinë e letërsisë shqiptare për të kaluar kufijtë kulturorë dhe për të prekur zemrat e lexuesve të huaj. Ky libër është një dëshmi e qartë se humori dhe mendimi krijues janë universale dhe se shkrimtarët shqiptarë kanë shumë për të ofruar në arenën ndërkombëtare.

Zef Gjeta, me “Pyetje të Çuditshme – Përgjigje Interesante”, jo vetëm që ka argëtuar lexuesit, por ka treguar se si pyetjet dhe përgjigjet e thjeshta mund të hapin dritare të reja të të menduarit. Suksesi i këtij libri është një tjetër gur i çmuar në kurorën e tij si autor dhe një dhuratë e mrekullueshme për lexuesit anembanë botës. Kjo arritje dëshmon për fuqinë e penës dhe mendjes shqiptare që nuk njeh kufij dhe sfidon çdo barrierë ideologjike dhe retorikë politike që kërkojnë të qëndrojnë si mure ndarës mes kulturave dhe traditave, pasurive shpirtërore dhe integriteteve kulturore, ku diversiteti sjell pasurim dhe përjetim të mënyrës se si dija dhe fuqia krijues ndërtojnë ura komunikimi dhe bashkëjetojnë perëndishëm të sotmen në një botë të të gjithëve.