Zjarret në Shqipëri/ 10 vatra të raportuara në 24 orët e fundit, situata nën kontroll

Gjatë 24 orëve të fundit janë raportuar 10 vatra zjarri në të gjithë territorin e Shqipërisë, por të gjitha janë neutralizuar dhe aktualisht nuk rezulton asnjë vatër aktive apo nën monitorim.

Për përballimin e situatës dhe shuarjen e zjarreve janë angazhuar 174 forca operacionale vendore dhe lokale, të mbështetura nga 14 automjete zjarrfikëse. Në operacione kanë marrë pjesë edhe Forcat e Armatosura me 27 efektivë, 3 mjete dhe një ambulancë.

Në qarkun e Lezhës është shuar zjarri në fshatin Gallatë të Bashkisë Kurbin, i cili ishte përhapur nga territori i Bashkisë Mat. Ndërkohë, në qarkun e Elbasanit është vënë nën kontroll dhe shuar zjarri në Librazhd Katund, ku u përfshi edhe sipërfaqe me bimësi pishe.

Në Gjirokastër, vatra në Bularat të Bashkisë Dropull është shuar pas ndërhyrjes së strukturave vendore, policisë dhe Forcave të Armatosura. Në operacion morën pjesë forca të MZSH-së, bashkisë, policisë dhe FA-së.

Në qarkun e Dibrës janë shuar gjithashtu zjarret në Lundre-Madhesh, Cerrujë/Mali i Allushit dhe Selishtë, me pjesëmarrjen e shërbimeve zjarrfikëse, strukturave pyjore, bashkive dhe vullnetarëve.

Edhe në qarkun e Fierit janë shuar vatrat në Bitaj të Bashkisë Lushnje dhe në Rërës të Bashkisë Patos.

Agjencia Kombëtare e Mbrojtjes Civile vijon monitorimin e situatës në të gjithë vendin, në bashkëpunim me prefekturat, bashkitë dhe strukturat e tjera të emergjencave.

Forcat operacionale mbeten në gatishmëri për ndërhyrje të menjëhershme, me fokus mbrojtjen e jetës së qytetarëve, banesave, pasurisë dhe mjedisit.