Zjarri në hotelin e Vlorës, mjeku jep detaje: Një grua në gjendje kritike me djegie të rënda

Shefi i Reanimacionit në Spitalin Rajonal të Vlorës, Edmond Breshanaj, ka dhënë detaje mbi gjendjen e të lënduarve që mbërritën në spital pas zjarrit të rënë në një hotel në zonën e Lungomares.

Sipas tij, në spital u transportuan gjashtë persona, të cilët ndodheshin në katin e dytë të godinës në momentin kur shpërthyen flakët. Tre prej tyre kishin pësuar djegie të rënda, ndërsa dy të tjerë u hodhën nga kati i dytë për t’i shpëtuar zjarrit, duke pësuar fraktura në shtyllën kurrizore.

Breshanaj bëri me dije se dy pacientët me fraktura u dërguan në Qendrën e Traumës, ndërsa tre të tjerët u transferuan në repartin e djegieve për trajtim të specializuar. Ai theksoi se i gjithë stafi mjekësor u mobilizua menjëherë për të përballuar situatën emergjente.

Sipas mjekut, të lënduarit mbërritën në spital rreth orës 04:30. Njëra prej pacienteve ndodhet në gjendje kritike, pasi ka pësuar djegie në pothuajse të gjithë trupin, ndërsa një tjetër ka djegie në rreth 50% të sipërfaqes trupore. Të plagosurit janë të rinj, rreth moshës 25–30 vjeç, me origjinë nga Prishtina, Lipjani dhe Rrësheni.

Nga informacionet paraprake, zjarri dyshohet se ka nisur në lokalin e katit të parë të ndërtesës dhe më pas është përhapur në katin e dytë, ku funksiononte hoteli. Autoritetet vijojnë hetimet për të zbardhur shkaqet e ngjarjes.