Situata nga zjarri në malin e Borshit vijon të jetë kritike, ndërsa flakët me intensitet të lartë kanë përfshirë një sipërfaqe të madhe të zonës malore, duke rrezikuar seriozisht banesat në fshatrat Puqeras dhe Borsh.
Pavarësisht përpjekjeve të pandërprera të zjarrfikësve të Himarës gjatë gjithë ditës, terreni tepër i vështirë ka bërë të pamundur vënien nën kontroll të flakëve, që po përhapen me shpejtësi për shkak të erës dhe thatësirës.
Tymi i dendur nga vatrat ka pushtuar gjithë zonën bregdetare nga Borshi në Qeparo dhe deri në Himarë, duke sjellë vështirësi në qarkullim dhe shqetësim për banorët dhe turistët në zonë.
Autoritetet lokale kanë bërë thirrje për vigjilencë maksimale dhe janë në gatishmëri për të evakuuar banorët në rast përkeqësimi të mëtejshëm të situatës.
Forcat zjarrfikëse po kërkojnë mbështetje shtesë për të përballuar situatën, ndërsa pritet ndërhyrje nga ajri nëse kushtet e lejojnë.