Zjarri në Riban, deputeti i PS: U tejkalua rreziku për jetët e njerëzve dhe djegien e pronave të tyre

Situata në fshatin Riban të Mallakastrës, ku një vatër zjarri rrezikoi përkohësisht disa banesa të zonës, paraqitet tashmë e qetë. Deputeti i PS-së, Klevis Jahaj, tha se ndërhyrja nga ajri dhe toka ka përfunduar për ditën e sotme, ndërsa zona do të vijojë të mbahet nën monitorim nga forcat zjarrfikëse.

Sipas Jahajt, aktualisht nuk ka rrezik për jetën e banorëve apo për pronat e tyre, ndërsa banorët që ishin larguar përkohësisht janë rikthyer në banesat e tyre. ”Situata aktualisht paraqitet e qetë, është nën monitorim nga forcat zjarrfikëse të Bashkisë Mallakastër. Ka përfunduar ndërhyrja qoftë nga ajri, qoftë nga toka nga forcat zjarrfikëse që kanë ardhur në gatishmëri për të mbështetur bashkinë Mallakastër në këtë situatë. Situata do të mbahet nën monitorim gjatë natës, për të vijuar sërish në mëngjes operacionin për shuarjen e plotë të flakëve. Nuk paraqiten rrezikshmëri për njerëzit apo banesat e tyre”, tha Jahaj për ”Report Tv”.

Ai sqaroi gjithashtu se nuk bëhet fjalë për 15 banesa të evakuuara, por vetëm për tre familje që ishin larguar përkohësisht si masë sigurie dhe që tashmë janë kthyer në shtëpitë e tyre. ”Nuk janë 15 banesa që janë evakuuar, por ishin 3 të tilla, që janë kthyer sërish pranë banesave të tyre, sepse është shmangur gjithë rrezikshmëria që mund të kishte për të rrezikuar djegien e pronës së tyre, qoftë edhe jetën e qytetarëve. Ky është një lajm i rëndësishëm”, u shpreh deputeti socialist.

Jahaj bëri të ditur se operacioni do të vijojë edhe ditën e nesërme, me ndërhyrje nga ajri dhe nga toka, me qëllim shuarjen përfundimtare të flakëve. Sipas tij, zjarri nisi në orët e para të mëngjesit dhe ndërhyrja e shpejtë e strukturave zjarrfikëse bëri të mundur shmangien e përshkallëzimit të situatës.

”Forcat zjarrfikëse janë alokuar në 2 vatrat brenda pyllit. Sot zjarri nisi në orët e para të mëngjesit. Ka pasur një reagim shumë të shpejtë nga zjarrëfikësit e Mallakastrës, por edhe të bashkive të tjera të qarkut të Fierit. U bashkangjitën në operacion edhe zjarrfikësit e Beratit dhe Cërrikut. Ka pasur një ndërhyrje të menjëhershme nga emergjencat kombëtare civile, duke shmangur agravimin e situatës, por edhe mos-rrezikimin e jetëve të njerëzve dhe banesave që ishin përreth pyllit”.