1 vit pas ekzekutimit, del që shkencëtari bërthamor u vra me armë 1 tonëshe

Kryeshkencëtari bërthamor i Iranit, Mohsen Fakhrizadeh u vra nga zbulimi izraelit Mossad pranë Teheranit nëntorin e kaluar, me një armë super-preçizioni të montuar në një fuoristradë Nissan. Arma një tonëshe për kryerjen e atentatit është futur ilegalisht pjesë-pjesë në vend nga një grup prej 20 operativësh të spiunazhit izraelit dhe qytetarë iranianë.

Mohsen Fakhrizadeh, i njohur si “babai i bombës” u vra në nëntor nga një shpërthim prej 13 plumbash prej një arme automatike, e cila nuk kishte lënduar as gruan dhe asnjë nga rojet e tij.

Arma e preçizionit të lartë ishte futur ilegalisht në vend për sulmin për një periudhë prej tetë muajsh. Arma ishte aq e rëndë pasi përfshinte dhe një bombë për vetëshkatërrimin e saj, për zhdukjen e provave pas atentatit.

Atentati funksionoi pasi shërbimet e sigurisë së Iranit ishin të zëna me ndjekjen e të dyshuarve si disidentë politikë. Fakhrizadeh dyshohej nga Izraeli se po punonte në programin sekret të krijimit të bombës bërthamore.