101-vjeçari del nga spitali, shpresë që Europa të sfidojë virusin

Edhe pse shifrat e të vdekurëve nga Covid-19 janë të frikshme, të shëruarit nga ky virus vdekjeprurës japin shpresë për shpëtim. Një burrë 101-vjeçar ka dalë nga spitali pasi është shëruar nga koronavirusi, tha Gloria Lisi, nënkryetarja e Bashkisë së Riminit. I moshuari, emri i të cilit nuk është bërë publik, u shtrua në spitalin e qytetit verilindor javën e kaluar, pasi testi për Covid-19 rezultoi pozitiv.

Lisi tha se ky rikuperim ishte vërtet i jashtëzakonshëm, që jepte shpresë për të ardhmen. “Zoti P. ia doli. Familja e mori në shtëpi të enjten në mbrëmje. Kjo na mëson se edhe e ardhmja e një 101-vjeçari nuk është e paracaktuar”.

Ajo që e bën edhe më të veçantë historinë e tij është fakti që ka lindur në vitin 1919, gjatë pandemisë së gripit spanjoll, që vlerësohet se i ka marrë jetën 30-50 milionë personave. Në Rimini janë regjistruar 1189 raste me koronavirus, sipas departamentit të Mbrojtjes Civile, ndërsa e gjithë Italia është një ndër vendet më të prekur nga pandemia, me numrin më të lartë të vdekjeve në të gjithë botën.