150 milionë të prekurit nga Covid-19 në botë, situatë katastrofike në Indi

Pandemia e Covid-19 ngjiti një tjetër tavan prej 150 milion të prekurish. Edhe pse ka kaluar mbi 1 vit që kur Covid-19 u shfaq për të parën herë në Uhan të Kinës, virusi vijon të shfaqë forma edhe më agresive se më parë.

Infektimet ditore janë ende të larta në shkallë globale, çka tregon se fundi i pandemisë ende nuk po duket. 24-orëshi i fundit shënoi ndër shifrat maksimale të valës së radhës të infektimeve me mbi 887 mijë raste ditore.

Situatë katastrofike po përjeton këto ditë India ku rekordet e errëta nuk kanë fund. Këtë 24-orësh u shënuan mbi 379 mijë infektime ditore, shifra e re më e lartë në botë.

Pacientët në gjendje të rëndë në spitale janë në mëshirë të fatit pasi kapacitetet janë ezauruar me kohë dhe kjo ka ndikuar po ashtu në shënimin e rekordeve të njëpasnjëshme ditore edhe të viktimave.