Trump kërcënon BE-në me tarifa pas afrimit me Kanadanë: Mund të ndalojmë tregtinë!

Presidenti i SHBA-së, Donald Trump, ka reaguar ashpër ndaj nismës së Bashkimit Evropian për të thelluar marrëdhëniet me Kanadanë, duke paralajmëruar tarifa të reja dhe madje kufizime të mëtejshme në tregtinë me Evropën.

Reagimi i Trump vjen pasi presidentja e Komisionit Evropian, Ursula von der Leyen, propozoi që Kanadaja të bëhet anëtarja e parë e asociuar e BE-së, si pjesë e një partneriteti më të gjerë në ekonomi, mbrojtje, energji, teknologji dhe minerale kritike.

Duke folur me gazetarët, Trump e cilësoi si “qesharake” mundësinë e një afrimi të tillë dhe paralajmëroi masa ekonomike nëse e konsideron nismën si një veprim armiqësor ndaj SHBA-së.

“Nëse e konsideroj si një akt armiqësor, do të vendos tarifa shumë të rënda ose do të ndaloj tregtinë me Evropën në shumë fusha”, tha Trump.

Presidenti amerikan shtoi se reagimi i Uashingtonit do të varej nga qëllimi i marrëveshjes. Sipas tij, nëse nisma ka qëllime pozitive, situata mund të jetë ndryshe, ndërsa në rast të kundërt ai paralajmëroi tarifa të larta ndaj BE-së.

Kryeministri kanadez, Mark Carney, ka mbështetur afrimin me BE-në, duke argumentuar se bashkëpunimi më i ngushtë do të forconte Kanadanë dhe do ta bënte atë një partnere më të qëndrueshme edhe për SHBA-në.

Në një fjalim në Parlamentin Evropian, Carney theksoi se Kanadaja është e interesuar për bashkëpunim më të thellë me Evropën në fusha si siguria energjetike, mineralet kritike, inteligjenca artificiale, mbrojtja dhe tregtia digjitale.

Ai gjithashtu sqaroi se diskutimi për një status të asociuar nuk nënkupton që Kanadaja synon anëtarësimin e plotë në Bashkimin Evropian. Çështja kryesore, sipas tij, është përmbajtja dhe niveli i bashkëpunimit që mund të ndërtohet mes palëve.