97-vjeçarja thyen rekordin në garat e vrapit, 4 javë pas operacionit në zemër

Grace Chambers, 97 vjeçe ka hyrë në histori si Parkrunner-i më i moshuar në Europë që arrin pragun e 250 vrapimeve. Ajo e shënoi këtë arritje të jashtëzakonshme duke përfunduar 5 kilometrat në Ormeau Park, në pjesën jugore të Belfastit.

E pabesueshmja është se vetëm katër javë më parë Grace iu nënshtrua një operacioni në zemër, por kjo nuk e pengoi që të merrte pjesë në garën e së shtunës. “Jam mbi hënë që e përfundova,” tha ajo pas vrapimit. Chambers nisi udhëtimin e saj me Parkrun në vitin 2016, kur një anëtar i ekipit të saj të rehabilitimit i sugjeroi aktivitetin si mënyrë për t’u mbajtur aktive. Me pak inkurajim nga vajza e saj, ajo mori pjesë për herë të parë dhe u bë menjëherë “ylli” i ngjarjes. “Të gjithë thoshin: ‘Kjo grua në të 80-at mendon se mund të bëjë Parkrun’. Dhe ua tregova unë,” tha ajo me humor.

Që atëherë, Grace është bërë pjesë e rregullt e komunitetit, duke thyer rekorde në kategorinë e saj të moshës dhe duke fituar respektin e qindra vrapuesve nga e gjithë Irlanda e Veriut. Madje, gjatë pandemisë, kur Parkrun u pezullua, ajo vazhdoi ta bënte vetë çdo javë, duke regjistruar kohët e saj dhe duke i dërguar më pas tek organizatorët.

As një këmbë e thyer gjatë pandemisë nuk e ndali. Pas rikuperimit, ajo u rikthye menjëherë në pistë. Sot, në çdo fundjavë, dy miket e saj Cathy dhe Sue e shoqërojnë gjatë garës. Në nder të saj, pranë vijës së finishit në Ormeau Park është vendosur edhe një stol me mbishkrimin: “Grace’s Bench, Park runner extraordinaire”, ku ajo shpesh pozon për fotografi me adhuruesit.

Shumë personalitete kanë ardhur ta takojnë, përfshirë kampionen olimpike Dame Kelly Holmes, e cila madje vrapoi krah saj. “Kelly donte të fliste gjatë rrugës, por unë i thashë: ‘Hajde Kelly, po më ngadalëson’,” tregoi Grace me të qeshur. Në garën e 250-të ishte i pranishëm edhe doktori që i zëvendësoi valvulën e zemrës, kardiologu Jonny Mailey, i cili u shpreh i mahnitur: “Ajo është fantastike dhe ajo që ka arritur është e pabesueshme, një testament i forcës së saj si person.”

Edhe organizatorët e Parkrun në Belfast e cilësojnë Grace si një “legjendë lokale”, ndërsa deputetja e zonës Claire Hanna tha: “Urime të paimitueshmes Grace. Ajo është frymëzim për shumëkënd.”  97-vjeçarja e merr me thjeshtësi këtë arritje: “Shumë njerëz bëjnë gjëra shumë më të jashtëzakonshme se kjo. Por nëse unë frymëzoj dikë tjetër të fillojë vrapin, atëherë është fantastike”.