Aksident tragjik në Milano: Tramvaji del nga shinat, një viktimë dhe 39 të plagosur

Të paktën një person ka humbur jetën dhe 39 të tjerë janë raportuar të plagosur, disa prej tyre rëndë, pasi një tramvaj doli nga shinat në qytetin verior italian të Milanos. Ngjarja tragjike ndodhi në qendër të Milanos, në rrugën “Vittorio Veneto”, rreth orës 16:00, kur tramvaji i mbushur me pasagjerë u përplas me sa duket në anën e një ndërtese.

Personi që vdiq mendohet të jetë goditur nga tramvaji, ndërsa shumica e të plagosurve ishin pasagjerë. Shkaku i daljes nga shinat nuk është ende i qartë, megjithëse raportet e mediave sugjerojnë se tramvaji mund të ketë marrë një kthesë të mprehtë me shpejtësi të lartë, teksa dilte nga rruga “Vittorio Veneto”.

Menjëherë pas aksidentit, në vendngjarje mbërritën ambulanca të shumta dhe u raportua se kishte persona të bllokuar në rrënoja. Ekipet e mbrojtjes civile kanë ngritur një tendë për të ndihmuar të plagosurit, ndërsa operacionet e shpëtimit vazhdojnë.

Pasagjerët dëshmuan se kishin dëgjuar një zhurmë poshtë tramvajit, pas së cilës ai devijoi, mori shpejtësi dhe goditi ndërtesën. Një dëshmitar i tha agjencisë Ansa se “mendova se ishte një tërmet”, ndërsa një tjetër nga afër tha se “dëgjova një zhurmë të madhe” dhe pa një pjesë të tramvajit të kishte hyrë në një dyqan. Kryebashkiaku i Milanos, Giuseppe Sala, dhe zyrtarë të tjerë të qytetit kanë mbërritur në vendin e ngjarjes.