Alarm në Moskë, zjarr në Katedralen e Shën Vasilit, evakuohet zona

Një zjarr ka përfshirë mbrëmjen e së premtes Katedralen ikonike të Shën Vasilit në Sheshin e Kuq të Moskës, por ndërhyrja e shpejtë e forcave zjarrfikëse bëri të mundur lokalizimin dhe shuarjen e flakëve në një kohë të shkurtër.

Sipas agjencisë shtetërore ruse të lajmeve TASS, zjarri ka prekur një sipërfaqe prej rreth 10 metrash katrorë dhe ka nisur në katin e parë të katedrales, në ambientet e zyrës së një kleriku. Nga flakët janë dëmtuar disa sende personale dhe mobilie.

Për përballimin e situatës janë angazhuar 10 mjete zjarrfikëse, të cilat kanë ndërhyrë menjëherë për të parandaluar përhapjen e mëtejshme të zjarrit në një nga monumentet më të njohura të Moskës.

Autoritetet kanë bërë të ditur se nga incidenti nuk ka persona të lënduar. Ndërkohë, shkaqet e shpërthimit të zjarrit mbeten ende të paqarta dhe po hetohen nga strukturat përkatëse