Amerikanët zbulojnë një ndër tunelet më të fortifikuara të trafikut të kokainës

Një tunel gjigant i gjatë sa gjashtë fusha futbolli që lidhte një magazinë në Tijuana me qytetin San Diego në Kaliforni, është zbuluar nga policia amerikane. Kalimi i fshehtë ishte i pajisur me sistem hekurudhor, elektricitet, sistem ventilimi dhe mure të fortifikuara.

Autoritetet thanë se nuk e dinin për sa kohë kishte qenë në veprim tuneli, por gjatë operacionit u sekuestrua 799 kg kokainë, 75 kg metamfetaminë dhe 1,6 kg heroinë.

Ai është tuneli i 272-ti i zbuluar në kufirin meksikano-amerikan që prej vitit 1993 dhe i 15-ti prej vitit 2006. Trafikantët kanë kaluar nga Meksika drejt Shteteve të Bashkuara, sasi të mëdha drogash të forta, si kokaina dhe heroina.