Antiterrori, 14 të arrestuar në Itali. Financonin grupin “Al Nusra”

Dy hetime të ndara të policisë dhe “Guardia di Finanza”-s së Sardenjës dhe Lombardisë, të koordinuara nga Prokuroria Kombëtare, dolën në përfundimin se të arrestuarit financonin grupin terrorist “Al Nusra” në Siri.

14 persona ranë në pranga në Itali, në kuadër të një operacioni masiv kundër terrorizmit. Forcat e policisë italiane u hodhën në veprim njëkohësisht në disa qytete të vendit, duke arrestuar të dyshuarit.

Sipas hetuesve, bëhet fjalë për dy organizata që vepronin në Itali në mënyrë të pavarur nga njëra-tjetra, por kishin një person që mbante kontaktet.

14 të arrestuarit janë sirianë dhe marokenë, të cilët akuzohen se grumbullonin fonde në komunitetet islamike në Itali dhe më pas i dërgonin paratë në Siri, për të mbështetur grupet terroriste si “Jabbat al Nusra”.

Mësohet se të arrestuarit e ushtronin këtë aktivitet edhe në vende të tjera europiane, si në Suedi, Hungari dhe Turqi.