Arrestohet kryebashkiaku i Rio de Janeiro në Brazil

Policia ka arrestuar kryetarin e bashkisë në largim të Rio de Janeiro, Marcelo Crivella, aleat i presidentit, Jair Bolsonaro . Arrestimi i tij ka ardhur pas një hetimi të dyshuar për korrupsion në bashkinë e qytetit.

Katër makina policie dhe prokurorë arritën pak para orës 6:00 të mëngjesit në shtëpinë e kryebashkiakut në lagjen e pasur Barra de Tijuca, sipas faqes në internet të O Globo.

“Ky është përndjekje politike,” u tha Crivella gazetarëve ndërsa po e dërgonin në stacionin e policisë, shkruan Daily Mail, përcjell abcnews.al.

Arrestimi vjen disa ditë para se të mbarojë mandati i Crivella-s dhe vetëm disa javë pasi kryebashkiaku e kishte quajtur homoseksualizmin një “të keqe të tmerrshme”.

Crivella është peshkop ungjillor dhe ish senator, i cili shërbeu si ministër i peshkimit në qeverinë e Dilma Rousseff. Ai është nipi i Edir Macedo, ky i fundit themeloi kishën ungjillore të fuqishme Kisha Universale e Zotit.

Prokurorët filluan hetimin e një “sporteli biznesi” që dyshohet se vepronte brenda bashkisë në 2019. Në shtator, një hetim nga TV Globo zbuloi se punonjësit e bashkisë të njohur si ” kujdestarët e Crivella ” ishin paguar për të qëndruar jashtë spitaleve dhe për të ndaluar qytetarët që ankoheshin për kujdesin shëndetësor. Crivella tha se nuk kishte asnjë bazë për akuzat.