BE-ja miraton objektivin klimatik për vitin 2040, ulje 90% e emetimeve

Bashkimi Evropian ka miratuar një objektiv ambicioz klimatik për vitin 2040,  duke synuar reduktimin e emetimeve të gazrave serrë me të paktën 90% krahasuar me vitin 1990. Nga kjo ulje,  5% mund të arrihet përmes kompensimeve ndërkombëtare,  si investime në projekte që heqin emetimet nga atmosfera jashtë BE-së.

Ministrat e Mjedisit të BE-së ranë dakord që sistemi i krediteve të karbonit të futet gradualisht nga viti 2031,  duke arritur përdorim të plotë deri në 2036. Këto kredi do të lejojnë konvertimin e investimeve klimatikisht pozitive jashtë BE-së në ulje të llogaritshme brenda unionit

Objektivi do të rishikohet periodikisht për të siguruar përputhshmëri me zhvillimet shkencore dhe ekonomike. Negociatat u karakterizuan nga kompromise të vështira,  pasi disa vende kishin rezerva ekonomike dhe gjeopolitike. Ministri danez i Klimës,  Lars Aagaard,  tha:

“Gjatë ditës dhe natës së djeshme punuam pa ndërprerje për të arritur një marrëveshje. Nuk ka qenë e lehtë.”

Vendimi u miratua me shumicë të dyfishtë,  që kërkon mbështetjen e të paktën 15 nga 27 vendet anëtare,  përfaqësuese të 65% të popullsisë së BE-së.

Sllovakia,  Hungaria dhe Polonia votuan kundër ndersa Bullgaria dhe Belgjika abstenuan.

BE-ja mbështeti gjithashtu një plan klimatik të detyrueshëm për vitin 2035,  që synon uljen e emetimeve me 66.25% deri në 72.5% krahasuar me vitin 1990.

Ky hap përforcon angazhimin e BE-së ndaj Marrëveshjes së Parisit dhe vjen pak ditë para Konferencës së OKB-së për Klimën (COP30) në Brazil.