BE jep 84 mijë euro për zonat e përmbytura në Maqedoni

Komisioni Evropian do të ndajë 84.236 euro ndihmë për të mbijetuarit në përmbytjet në Maqedoni gjatë muajit janar dhe shkurt të cilat shkaktuan dëme të konsiderueshme materiale dhe në të cilat sipas Federatës ndërkombëtare të Kryqit të Kuq (IFRC), janë goditur 100.000 njerëz.

Siç njoftoi Delegacioni i KE-së në Maqedoni, ndihma financiare e BE-së, e siguruar përmes Fondit për tejkalim urgjent të katastrofave të Kryqit të Kuq (DREF), do ta mbështesë ndihmën vijuese të Kryqit të Kuq lokal për tejkalimin e pasojave nga përmbytjet.

Ndihma do të shfrytëzohet për shpërndarje të ushqimeve, materialeve higjienike dhe mjete të tjera bazë siç janë veshje dhe batanije. Në mënyrë të drejtpërdrejtë ndihmën do ta shfrytëzojnë pothuajse 1.000 familje (rreth 4.000 njerëz).

KE-ja nënshkroi marrëveshje për ndihmë humanitare me Kryqin e Kuq në vlerë prej 3 milionë euro me Federatën ndërkombëtare të Kryqit të Kuq dhe Gjysmëhënës së Kuqe (IFRC) për mbështetje të Fondit për Tejkalim Urgjent të Katastrofave (DREF). Fondet nga DREF më së shpeshti ndahen për katastrofa nga "niveli i ulët" – për të cilat nuk është e nevojshme kërkesë formale ndërkombëtare.