Belgjika kap rastin e parë të variantit afrikan të Covid-19

Belgjika ka konfirmuar më 26 nëntor rastin e parë me variantin afrikan të koronavirusit. Varianti i ri, B1.1.529 ka detyruar shumë shtete që t’i mbyllin kufijtë pasi që rastet e para u paraqitën në Afrikën e Jugut.

Referuar të dhënave të fundit, më shumë se 25 mijë raste të reja në ditë po raportohen në Belgjikë, më shumë se në çfarëdo kohe tjetër që nga shpërthimi i pandemisë.

Presidentja e Komisionit Evropian, Ursula von der Leyen, ka kërkuar të suspendohen të gjitha udhëtimet për dhe nga shtetet ku është identifikuar varianti i ri i Covid-19.

Varianti më i ri u identifikua fillimisht në Afrikë të Jugut dhe besohet se ka mutacione të shumta që do të mund të mposhtnin sistemin imunitar të njerëzve shumë më shpejt.