Boom donacionesh për lobin pro armëve në SHBA

Pavarësisht indinjatës mbarëkombëtare që shkaktoi vrasja e 17 personave në një shkollë të Parklandit në Florida, Shoqata Kombëtare amerikane e Armëve, “NRA” ka mbledhur donacionet më të mëdha të 15 viteve të fundit.

Fondi politik i lobit të fuqishëm të armëve arriti të grumbulloje në muajin mars 2.4 milionë dollarë, siç tregojnë të dhënat e depozituara pranë komisioneve federale zgjedhore “FEC”.

Kjo nuk është hera e parë që vrasjet masive pasohen nga një bum dhurimesh. Organizatat e kontrollit të armëve, nga ana tjetër nuk kanë parë fitime të njëjta.

Grupi jofitimprurës “Çdo qytet për sigurinë e armëve” mblodhi në muajin mars vetëm 13.580 dollarë për fondin e tij politik. Lëvizja “Marshimi për jetët tona”, e krijuar pas të shtënave në Parkland, arriti të grumbullojë 3.5 milionë dollarë që nga shkurti.