Presidenti i Republikës, Bajram Begaj, ka mbledhur sot Këshillin e Sigurisë Kombëtare, në orën 08:30, në Pallatin e Brigadave.
Mbledhja ka zgjatur më shumë se një orë dhe u zhvillua pas ngjarjeve të fundit që lidhen me ish-drejtuesen e SHISH, Vlora Hyseni, ndaj së cilës është caktuar masa e “arrestit në shtëpi”.
Në fokus të diskutimeve ishte situata e sigurisë kombëtare, siguria e informacionit të klasifikuar dhe zhvillimet e fundit në Shërbimin Informativ të Shtetit. Në tryezë mësohet se është diskutuar edhe çështja e drejtimit të ri të SHISH, të cilin pas largimit të Hysenit e ka zënë drejtori i komanduar në SHISH, Elvis Lila.
Këshilli i Sigurisë Kombëtare kryesohet nga Presidenti i Republikës dhe përfshin drejtuesit e institucioneve kryesore të shtetit dhe të sigurisë.
Në mbledhje marrin pjesë Kryeministri Edi Rama, Kryetari i Kuvendit Niko Peleshi, Ministri i Mbrojtjes Ermal Nufi, Ministri i Brendshëm Ervin Demo, Ministri për Evropën dhe Punët e Jashtme Ferit Hoxha, si edhe drejtues të institucioneve të sigurisë, përfshirë SHISH-in, Policinë e Shtetit dhe Shtabin e Përgjithshëm të Forcave të Armatosura.
Sipas përcaktimeve ligjore, Këshilli i Sigurisë Kombëtare është organ këshillimor i Presidentit të Republikës për çështjet e sigurisë kombëtare. Në varësi të rendit të ditës dhe çështjeve që do të diskutohen, Presidenti mund të ftojë edhe drejtues apo përfaqësues të tjerë institucionesh.
Për herë të fundit Këshilli i Sigurisë Kombëtare është mbledhur në qershor 2023, kur u diskutua “Gjendja e sigurisë kibernetike dhe masat e marra për forcimin e mbrojtjes kibernetike në Republikën e Shqipërisë”.