Boshatisja e sediljes së mesit do të rrisë 50% çmimet e biletave të avionëve

Industria e fluturimeve me avion vazhdon të shprehë rezerva për idenë e zbrasjes së ndenjëseve të mesit te avionët për të zvogëluar rrezikun e transmetimit të koronavirusit ndërmjet pasagjerëve. Kjo sipas një shoqate përfaqësuese të kompanive do dëmtonte drejtpërdrejt klientët nëpërmjet çmimeve të larta.

Kompanitë ajrore do i rritin deri 50 për qind çmimet e biletave të avionëve në rast se shtetet i detyrojnë ato të boshatisin sediljet e mesit si masë për mbrojtjen e pasagjerëve nga pandemia Covid-19.

Një sondazh i kryer nga Shoqata Ndërkombëtare e Transportit Ajror tregon se shumica e kompanive presin të humbasin të ardhurat si pasojë e kësaj politike të distancimit social, pasi do të ulej me mbi 62 për qind numri i pasagjerëve për avion.

Këtë situatë do mund ta përballonin vetëm 4 nga 122 kompanitë e marra në studim nëpër botë.

“Kompanitë ajrore po luftojnë për mbijetesë. Me eliminimin e sediljeve të mesit, do rriten kostot, dhe nëse kjo do kompensohet me bileta më të shtrenjta, do të marrë fund epoka e fluturimeve me çmime të ulëta. Nga ana tjetër, nëse kostot nuk rikuperohen nga biletat, kompanitë thjesht do falimentojnë,” njoftoi të martën drejtuesi i shoqatës ndërkombëtare.

Për të ulur rrezikun e përhapjes së koronavirusit në bordin e avionit, kompanitë rekomandojnë mbajtjen e detyrueshme të maskave, matjen e temperaturës para fluturimit, procedura të reja të hipjes në avion, kufizim të lëvizjeve nga ana e pasagjerëve dhe thjeshtësim të procesit të kateringut gjatë fluturimit.

Kompanitë ajrore paralajmërojnë se si pasojë e pandemisë, vëllimi i fluturimeve me gjasë ka për të arritur nivelin e vitit të kaluar në 2025-ën.

Të martën u njoftua se kriza aktuale pandemike vetëm në industrinë ajrore amerikane po shkakton humbje financiare deri 10 miliardë dollarë çdo muaj.

Prodhuesi vendës i avionëve, Boeing, ka njoftuar se do të shkurtojë 16 mijë vende pune brenda vitit, ndërsa në Britani kompanitë British Airëays dhe Virgin presin deri 15 mijë shkurtime për 2020-ën.

Industria ajrore vlerëson se dëmet këtë vit do prekin shifrën 300 miliardë dollarë nëse kriza do të zgjatë.